Гиёҳвандлик воситаларинг “рекламаси” ҳақида тезкор хабар

Яқинда ижтимоий тармоқларда турар жойлар деворларида гиёҳвандлик воситалари рекламаси ёзувлари пайдо бўлаётгани ҳақида хабар тарқалди.
Мазкур факт бўйича қуйидагиларни маълум қиламиз. Тошкент шаҳар ИИББ ходимлари томонидан ўтказилган текширув давомида аниқланишича, Мирзо-Улуғбек тумани “Бўз” маҳалласида бир нечта уйлар деворларида ёзувлар пайдо бўлган. Аҳоли орасида ўтказилган сўров натижасида ёзувлар 5-6 кун олдин пайдо бўлгани аниқланди.
Текширув натижасида мазкур ёзувларни қолдирган фуқаролар – 18 ёшли Б.И. ва 21 ёшли И.В.ларнинг шахслари аниқланди.
Суҳбат давомида Б.И. жорий йилнинг март ойида обуна бўлган телеграм каналда иш ҳақида эълон чиққанлигини маълум қилди. Б.И. номаълум шахс билан телефон орқали боғланиб, ундан ҳақ эвазига уйларнинг деворларида қолдириш керак бўлган ёзув матнини олган. Шундан сўнг Б.И. таниши И.В. билан линолеумдан эълон матнини қирқиб, бўёқ баллончаси ёрдамида уйларнинг деворларида ёзув қолдиришган.
Мазкур факт бўйича текширув ишлари давом этмоқда.