Hurmatli haydovchilar va poytaxtimiz mehmonlari! Bugungi kunda shahrimiz yo‘llarida harakat xavfsizligini ta’minlash, tirbandliklarning oldini olish va bartaraf qilish hamda yo‘llarning o‘tkazuvchanligini oshirish maqsadida Toshkent shahar IIBB tomonidan keng ko‘lamli amaliy chora-tadbirlar olib borilmoqda. 

Biroq, shunga qaramay, to‘xtash va to‘xtab turish taqiqlangan yo‘l belgilari ta’sir doirasida, shuningdek, avtobus bekatlari, trotuarlar, svetaforlar, burilish va qayrilib olish kabi belgilanmagan joylarda avtotransportlarning to‘xtab turishi yoki ularni qarovsiz qoldirib ketish holatlari uchramoqda. 

Bunday holatlarga qarshi ta’sir doirasini kuchaytirish maqsadida Toshkent shahar IIBB YHXB xodimlari tomonidan endilikda belgilanmagan joylarda qoldirilgan avtomobillar foto va video tasvirga olinib, o‘rnatilgan tartibda qoidabuzarliklarni rasmiylashtirish jarayoni boshlanganligini ma’lum qilamiz. 

Shunday ekan, hurmatli haydovchi, Sizdan, yo‘llarda yanada e’tiborli bo‘lishni va yo‘l harakatining boshqa ishtirokchilariga nisbatan hurmat ko‘rsatishingizni hamda qoidalarga amal qilishingizni so‘rab qolamiz!