Ота ўгити ҳамиша ёдида
“Ўғлим, ҳалол ишлайман, ноҳақлик қилмайман, бировларнинг кўнглига бесабаб озор бермайман, десанг танлаган касбу корингга барака, оқ фотиҳа бераман”, деганди умрининг охиригача оддий ишчи бўлиб меҳнат қилиб рўзғор тебратган Равшан ака ўғли Баҳромга. Мана шунга ҳам ўн беш йилдан ошибди. Отасининг бу сўзлари ички ишлар идораларида ишлашни мақсад қилган Баҳромнинг қалбига муҳрланиб, ҳанузгача қулоғи остида жаранглаб туради. Баҳром Юлдашев Ўзбекистон Қуролли кучларида йигитлик бурчини ўтаб қайтиши билан Тошкент шаҳар ИИББга ҳужжатларини топширди. 2009 йилда Олмазор тумани ИИБда сафдор ҳайдовчи лавозимида иш бошлади. Биринчи навбатда ҳудуддаги ҳар бир кўча, маҳалла, бино ва иншоотлар, корхона ташкилотларнинг жойлашуви, қайси манзилга қанча вақтда етиб бориш лозимлиги тартибини ўрганди. Эътиборини хизмат вазифалари, фуқаролар билан мулоқот жараёнлари, меъёрий ҳужжатлар билан ишлаш, жиноят ва ҳуқуқбузарликлар содир этилган жойларга чиқишда биринчи навбатда қилинадиган ишлар, диққат бериладиган нарсаларга қаратди. Касбий ва жисмоний тайёргарлигига катта эътибор берди. Ҳолбуки, одамлар гавжум жойларда бемақсад юрган, шубҳали хатти-ҳаракатлар қилган фуқароларнинг шахсига аниқлик киритиш мақсадида туман ички ишлар бўлимига келтириш чоғида айримлар қаршилик кўрсатарди. Кучли жисмоний қаршилик кўрсатган ёки шахсини яшириб, турли важларни рўкач қилиб, ялиниб-ёлворганлар, пора таклиф қилганларнинг аксарияти жиноят содир этиб тергов ва суд идораларидан қочиб юрганларни ташкил қиларди. Шу боис улар осонликча ходимлар талабларига бўйсинишмасди. Ўз хизмат вазифаларига виждонан ёндашган, топшириқларни ўз вақтида бажариб келаётган сафдор Баҳром Юлдашев 2017 йилда Олмазор тумани 3-сонли ИИБ навбатчилик қисмига сўнгра тумандаги 4-сон ИИБ навбатчилик қисми навбатчи ёрдамчиси лавозимига ўтказилди. Унинг фуқаролар билан хушмуомаласи, мурожаатларига тезкор муносабати, қисмга тушаётган мурожаатларни ижрочига тезкор етказишда масъулияти раҳбарият томонидан эътиборсиз қолмаяпти. Қатор фахрий ёрлиқлар, ташаккурномалар билан тақдирланиб келинмоқда. Ўз ишига жонкуярлиги, фидойи ёндашуви туфайли ҳамкасблари орасида ҳурмат ва обрў қозонган. Негаки, ҳеч қачон ўз навбатчилигидаги ишларни охирига етказмай кетмайди. Ҳамкасбларининг фикри ва мулоҳазаларига бефарқ эмас, зарур вақтларда керакли ёрдам кўрсата олади. Айни пайтда сафдор Баҳром Юлдашев турмуш ўртоғи Маърифатхон билан биргаликда 5 нафар – 3 қиз ва 2 ўғилни юртимизнинг муносиб фарзандлари қилиб тарбиялаб келмоқда. Баҳром уларнинг тарбиясига ҳамиша вақт топиб, уларнинг билимли ва баркамол бўлишларига катта эътибор беради. Муваффақиятлари қувонтирса, хатоларини тўғирлашга биргаликда ҳаракат қилади. Фарзандлар тарбиясида асосий эътибор - назорат ҳамда дўстлари кимлиги, ён-атрофидагилар кимлар, бўш вақтини қандай ўтказаётганлигидан ҳамиша хабардор бўлиш, имкон қадар уларни фойдали меҳнат ва машғулотларга жалб қилиш, деб ҳисоблайди. Фарзанд тарбиясига бефарқ бўлмаган оилада вояга етган болаларнинг Ватани ва халқ ишончини оқлаши, баркамол инсонлар бўлиб етишишига шубҳа йўқ.
