Тезкор хабарлар

Жорий йилнинг 12-февраль кунида Олмазор туманида яшовчи 48 ёшли Дурбек М.га нисбатан қўзғатилган жиноий иш бўйича олиб борилган дастлабки тергов ишлар давомида аниқланишича, у ўз хонадонида 26 та гугурт қутиларида умумий оғирлиги 137 граммдан ортиқ бўлган “марихуана” наркотик моддасини сақлаган. 9-март куни ушбу факт бўйича Дурбек М.га нисбатан Ўзбекистон Республикаси Жиноят кодексининг 273-моддаси 5-қисми (“Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш”) асосида жиноий иш қўзғатилди. Дурбек М. ҳибсга олинди.

***

7-февраль куни соат 22.15 да Яккасарой туманида 33 ёшли Сиявуш Х. исмли шахс 49 ёшли Махмуд Ф.га ўзини “Такси Грант” МЧЖ раҳбари деб таништириб, унга “Кобальт” автомобилини 5 минг АҚШ доллари эвазига сотиб олишни таклиф қилган. Пулларни олгач, Сиявуш Х. машинани февраль ойининг охиригача расмийлаштришни ваъда қилган. Аммо у ўз ваъдасида турмай пулларни ўз эҳтиёжига сарфлаб юборган. Сиявуш Х.га нисбатан Ўзбекистон Республикаси Жиноят кодексининг 168-моддаси (“Фирибгарлик”) асосида жиноий иш қўзғатилди.

***

Ички ишлар органларига бухоролик 30 ёшли Феруз Ф. мурожаат қилди. У қашқадарёлик 37 ёшли Зафар Х.га нисбатан чора кўришни сўрар эди. Унинг хабар қилишича, Зафар Х. ундан 2016-йилнинг декабрь ойидан 2018-йилнинг сентябрь ойигача 4 200 АҚШ доллари олиб, уни Жанубий Кореяга ишга жўнатишни ваъда қилган. Аммо Зафар Х. ўз ваъдасида турмай, пулларни сарфлаб юборган. Зафар Х.га нисбатан Ўзбекистон Республикаси Жиноят кодексининг 168-моддаси 3-қисми (“Фирибгарлик”) бўйича жиноий иш қўзғатилди.

***

9-март куни соат 17.30 да Ўзбекистон Республикаси Бош прокуратураси қошидаги Иқтисодий жиноятларга қарши кураш департаменти бўлимига хабар келиб тушди. Хабарда маълум қилинишича, 23-январь куни соат 17.00 да 48 ёшли масъулияти чекланган жамият раҳбари Бобир Б. ва 64 ёшли Левон Е. 43 ёшли Маъмура Г.га 2 дона бриллиант харид қилишни таклиф этишган. Бриллиант сифатида эса ҳеч қандай қийматга эга бўлмаган иккита қора тошлар кўрсатилган. Олди-сотди вақтида жабрланувчидан 15 минг АҚШ доллари олаётганда улар қўлга олиндилар. Ўзбекистон Республикаси Марказий банки ҳузуридаги Қимматбаҳо металлар агентлиги Давлат асиллик даражасини белгилаш палатасининг хулосасига кўра, тошлар қимматбаҳо ҳисобланмайдилар ва ҳеч қандай қийматга эга эмаслар. Ушбу факт асосида Ўзбекистон Республикаси Бош прокуратураси қошидаги Иқтисодий жиноятларга қарши кураш департаменти бўлими томонидан Ўзбекистон Республикаси Жиноят кодексининг 168-модаси 4-қсими (“Фирибгарлик”) бўйича жиноий иш қўзғатилди.