Жорий йилнинг 18 апрель куни Учтепа тумани ИИО ФМБга 42 ёшли Тохир М. мурожаат қилиб, кўчада эшиклари очиқ ва калити ўт олдиргичда қаровсиз қолдирилган “Матиз” русумли автомашинасини номаълум шахс олиб қочиб кетганлигини маълум қилган. Тошкент шаҳар ИИББ тезкор-қидирув хизмати ходимлари томонидан кўрилган чора-тадбирлар натижасида, автомашина шу куни топилиб, гумонланувчининг шахси аниқланган. У 20 ёшли Умиджон Р. бўлиб чиқди.

Мазкур ҳолат юзасидан Ўзбекистон Республикаси Жиноят кодексининг 267-моддаси (Транспорт воситасини олиб қочиш) билан жиноят иши қўзғатилган. Тергов давом этмоқда.

Ҳурматли ҳайдовчилар! Очиқ ҳолда қаровсиз қолдирилган автомобиль ғаразгўйлар учун жалб қилувчи омил ҳисобланади. Транспорт воситангиздан бир неча дақиқага узоқлашишни режалаштирганингизда ҳам уни калит билан қулфлаб кетинг.