Тошкент Шаҳар Ички Ишлар Бош Бошқармаси

Юнусободда ёшлар учун ибрат ва имконият дарси: Хатолардан хулоса чиқариш вақти

Юнусобод туманида пробация ҳисобида турувчи ёшларнинг ижтимоий мослашувига кўмаклашиш, уларнинг муаммоларини ўрганиш ва соғлом ҳаётга қайтариш мақсадида навбатдаги очиқ мулоқот ташкил этилди.Тадбирда нафақат туман, балки республика миқёсидаги масъул идоралар вакиллари иштирок этди. Хусусан, Ички ишлар вазирлиги Жамоат хавфсизлиги департаменти Пробация хизмати, Юнусобод тумани Ички ишлар органлари фаолиятини мувофиқлаштириш бошқармаси, Мудофаа вазирлиги Тоифаланган объектларни қўриқлаш қўшинлари масъуллари ҳамда маҳаллалардаги ёшлар етакчилари жам бўлишди.Учрашувда иштирок этган 150 нафар ёшнинг мурожаатлари диққат билан тингланди. Мулоқот давомида асосий эътибор уларнинг бандлигини таъминлаш, тадбиркорликка йўналтириш ва ҳуқуқий ёрдам кўрсатишга қаратилди. Кўплаб муаммолар жойида ижобий ҳал этилиб, масъулларга аниқ топшириқлар берилди.Тадбирнинг энг таъсирли ва ёшларнинг диққатини тортган қисми — собиқ маҳбуснинг чиқиши бўлди. Ушбу шахс ўз вақтида, бор-йўғи 14 ёшида биринчи марта жиноят кўчасига кириб қолгани ва умрининг 20 йилини панжара ортида ўтказгани ҳақида гапириб берди."Менинг энг катта хатом — ёшлигимдаги бебошлигим ва жиноятнинг оқибатини англамаганим бўлди. Бугун ортга қарасам, энг гўзал ва кучга тўлган 20 йилимни темир панжаралар ичида бой берибман. Сизларга маслаҳатим — ҳар бир қадамингизни ўйлаб босинг, давлат яратаётган имкониятлардан фойдаланинг, озодликнинг қадрига етинг," — дея таъкидлади у ўз нутқида.Бу иқрор ва самимий суҳбат ёшлар учун ўзига хос "акс-таъсир" терапияси бўлди. Кўп йиллар давомида эркинликдан маҳрум бўлган инсоннинг афсуслари йиғилганларни чуқур мушоҳадага чорлади.Мудофаа вазирлиги ва Ички ишлар органлари ходимлари ёшлар билан мулоқотда ватанпарварлик, тартиб-интизом ва жамиятда муносиб ўрин топиш бўйича ўз тавсияларини беришди. Ёшлар етакчилари эса ҳар бир пробация ҳисобида турган ёш билан индивидуал ишлаш, уларнинг бўш вақтини мазмунли ташкил этиш борасидаги режаларини баён этишди.Юнусободда ўтган бу тадбир шунчаки учрашув эмас, балки ёшларнинг хатолардан хулоса чиқариши ва янги, соғлом ҳаётга қадам ташлашлари учун муҳим туртки бўлди.Мулоқот якунида ёшлар учун мазмунли маданий тадбир ташкил этилди. Улар Мудофаа вазирлиги Тоифаланган объектларни қўриқлаш қўшинларининг тарихий музейига экскурсия қилишди. Музей экспонатлари, ҳарбий шон-шараф ва аждодларимиз жасорати акс этган лавҳалар ёшларда катта таассурот қолдирди. Бу каби ташрифлар уларда ватанпарварлик туйғусини шакллантириш ва қонунларга ҳурмат руҳида тарбиялашда муҳим аҳамият касб этади.

26 Март 2026 йил

185