Тошкент шаҳар ИИББ хотин-қизлар масалалари бўйича инспекторлари Миллий гвардиянинг аёл-хизматчилари билан биргаликда пойтахтлик аёлларга ёрдам бермоқдалар

Тошкент шаҳар ИИББ, Ўзбекистон Республикаси Миллий гвардияси ҳамда Маҳалла ва оилани қўллаб-қувватлаш бошқармасининг маҳаллаларда жиноятчиликни тўхтатишга қаратилган янги тизим жорий этиш тўғрисидаги қўшма ҳужжати мазкур йўналишда фаолият олиб бориш учун янги туртки бўлди.

Мазкур қарор асосида Тошкент шаҳар ИИББ ҲПБ хотин-қизлар масалалари бўйича бўлимнинг ташаббуси билан, манфаатдор идоралар билан биргаликда 2020 йил учун ҳамкорлик дастури ишлаб чиқилди. Жорий йилнинг 16 май куни оғир шароитда қолган аёлларга ёрдам бериш ва хотин-қизлар орасида ҳуқуқбузарликни олдини олиш бўйича пойтахт ИИББ хотин-қизлар масалалари бўйича инспекторлар томонидан олиб борилаётган серқирра ишларга илк маротаба Миллий гвардиядан 36 нафар аёл-хизматчилиар қўшилдилар.  

Дастлабки босқичларда туман ички ишлар бўлимларида Миллий гвардия хизматчилари учун тренинглар ўтказилиб, уларда пойтахт ИИББ хотин-қизлар масалалари бўйича инспекторлари ўз тажрибалари билан ўртоқлашдилар ҳамда психологик ёки бошқа зулмга учраган аёлларга қўриқлаш ордери берилишининг ҳуқуқий асосларини тушунтириб ўтишди.

Сўнг хотин-қизлар масалалари бўйича инспекторлардан ташкил топган ҳамкор гуруҳлар ва Миллий гвардиянинг аёл-хизматчилари хавотирли хабарлар келиб тушган оилалардан хабар олишди. Жойларда суҳбатлар ўтказилди, уйлардаги вазият ўрганилиб, муаммолар аниқланди. 

Бирор оилада аёл киши психологик ва руҳим босимга, ёки жисмоний зўравонликка учрагани маълум бўлса,  бу каби оилалар билан ишлар эҳтиёткорлик билан олиб борилади. Чунки бундай ҳолатларда одоб билан ишлаш, шунингдек, жабрланувчининг ҳатти-ҳаракатларига баҳо бермаслик, ҳукм чиқаришга шошмаслик, уларга диққат билан қулоқ солиш ва аёлларни ҳақоратлайдиган, камситадиганларга нисбатан кескин бўлиш талаб этилади. ИИББ ва Миллий гвардия ходималаридан ташкил топган қўшма гуруҳларнинг асосий вазифаси – муаммоларни аниқлаш ва уларни ҳал этишда ёрдам бериш, жабрланган аёлларни ҳуқуқини ҳимоя қилиш бўйича барча чораларни қўллаш, зарур ҳолларда – қўриқлаш ордерини топширишдир.

Ўтган 17 ва 18 май кунлари хотин-қизлар масалалари бўйича инспекторлар Миллий гвардиянинг аёл-хизматчилари билан биргаликда 223 тадан ортиқ оилаларда бўлиб, 48 та ҳар томонлама ёрдамга муҳтож оилаларни аниқладилар ва 52 нафар аёлларга қўриқлаш ордерларини топширишди.