Қарор ижроси пойтахт туманлари кесимида
Ҳар бир соҳада бажарилган ишлар сарҳисоби асосида, йўл қўйилган хато ва камчиликларни бартараф этиш, иш фаолиятини замон талабларига мос равишда ташкил этиш масалалари муҳокама этилиб, чора-тадбирлар белгиланади. Пойтахтнинг Юнусобод туманидаги жиноятчилик таҳлиллари асосида идоралараро мувофиқлаштириш ҳудудий ишчи гуруҳи тузилган. Гуруҳ аъзоларининг вазифалари тақсимоти белгиланган. Таъкидлаш жоизки, 6 та “қизил”, 51 та “сариқ” ва 7 та “яшил” тоифаларга киритилган маҳаллаларда Президентимиз томонидан қабул қилинган “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарори асосида ишни ташкиллаштириш юзасидан маҳалла еттилиги, масъуллар ва мутасаддилар иштирокида 70 дан ортиқ суҳбат ва ўқув семинарлари ўтказилди. Айни дамда долзарб бўлган кибержиноятлардан аҳолини ҳимоя қилиш, киберфирибгарликлар қурбони бўлиб қолмасликнинг олдини олиш борасида маҳаллаларда кенг аҳоли қатламини жалб қилган ҳолда етмиш маротаба профилактик, огоҳлантириш ишлари олиб борилди. Ҳуқуқбузарликлар содир этган шахсларга нисбатан автоматлаштирилган тартибда ижтимоий профилактика тадбирларини амалга ошириш учун тайёрланган 200 дан ортиқ хулосалар ижрога йўналтирилди. Маҳалла хотин-қизлари, тарбияси оғир ёшлар, пробация ҳисобида турган шахсларнинг ҳуқуқий саводхонлиги ва маданиятини оширишга қаратилган таъсирчан, манзилли суҳбат ва учрашувлар, тушунтириш ишлари 90 дан ортиқ маротаба ўтказилган бўлса, нотинч, ажрим ёқасида турган оилалардаги мавжуд муаммоларни бартараф этиш бўйича жамоатчилик кенгашлари, дин вакилларини жалб қилган ҳолда 40 дан ортиқ тарғибот тадбирлари бўлиб ўтди. Ёшларнинг бандлигини таъминлаш, интернет тармоқлари орқали берилаётган турли салбий, миллатимиз ва қадриятларимизга ёт ғоялардан, жиноий даъватлардан асраш, ҳимоя иммунитетини шакллантириш мақсадида маҳаллалар ёшлари билан икки юзга яқин, мактабларда эса вояга етмаган ўқувчи ёшлар билан мингдан ортиқ “Давомат”, “Ўқувчи”, “Ўсмир” тадбирлари олиб борилди. Бу тадбирлар жараёнида узоқ муддатга кетиб, дарс қолдираётган 38 нафар, мунтазам дарс қолдираётган 60 нафар, ота-она назоратидан маҳрум 16 нафар, боқувчисини йўқотган 17 нафар, тарбияси оғир ҳисобланган 57 нафар болалар аниқланиб, тегишли идора ва мутасаддиларга тақдимномалар киритилган. Мактаб ўқувчиларининг муаммоларини ўрганиш борасида 28 маротаба “Раҳбар ва ёшлар учрашувлари” ташкиллаштирилди. Дўстона ва самимий суҳбатларда ўқиш жараёни, ўқитувчи ва ўқувчи, тенгдошлар-мактабдошлар ўзаро муносабатларида юзага келиши мумкин бўлган ҳолатлар ўрганилиб, тегишли маслаҳат ва тавсиялар берилган.Шунингдек, маҳалла аҳлининг аксариятини ташкил қилувчи хотин-қизларнинг муаммоларини ўрганиш орқали 104 нафар аёлларнинг мурожаатлари ижобий ҳал қилинишига эришилди. Репродуктив саломатлигини тиклашга муҳтож бўлган 144 аёлга тиббий муолажалар учун имтиёзли йўлланмалар ажратилди. 368 нафар ижтимоий кўмакка муҳтож хотин-қизларнинг рўйхати шакллантирилди. 107 нафар ишсизлар рўйхатида турувчи шахсларнинг 72 нафарига иш жойлари тавсия қилиниб, 33 нафари касб-ҳунарга йўналтирилди. 20 нафар фуқаролар Ташқи миграция агентлиги орқали хориж давлатларига ишга юборилган. Муқаддам судланган ва маъмурий назоратда турувчи 9 нафар фуқаро билан тушунтириш, ҳуқуқий суҳбатлар ўтказилиб, улардан 5 нафарининг бандлиги таъминланди. Маҳаллалар ҳудудида содир этилган йигирмага яқин жиноят ва ҳуқуқбузарликлар кенг жамоатчилик иштирокида муҳоқама қилиниб, жамоавий таъсир чоралари қўлланилди. Юқоридаги қарорнинг ижросини таъминлаш, жиноятчилик ва ҳуқуқбузарликларнинг барвақт олдини олиш мақсадида, ўғрилик жиноятлари содир этилган “қизил” ва “сариқ” тоифадаги кўчаларда жойлашган тўқсонга яқин савдо-маиший хизмат кўрсатиш объектлари “Қўриқлаш” хизматига уланган бўлса, бозорлар, савдо мажмуалари ҳудудларида ўндан ортиқ кузатув ва назорат камералари ўрнатилди. “Қўриқлаш” хизмати томонидан мингдан ортиқ объектлар хатлов қилинди ҳамда “Ҳудуд камера назоратида”, “Объект қўриқловда” “Хонадон қўриқловда” каби 350 га яқин стикерлар ёпиштирилди. Бу каби профилактик тадбирлар, жиноятчилик ва ҳуқуқбузарликларнинг барвақт олдини олишга қаратилган мақсадли ва манзилли амалий ишлар изчил равишда давом эттирилади.
