Ҳалол меҳнат эътиборсиз қолмас
Банк ёки давлат аҳамиятига молик иншоотлар, муассасаларига кирган шахс албатта, эшик олдида турган ички ишлар органлари ходимига дуч келади. Кўпчиликда бирор иш қилмай, фақат ўтиради, нима фойда бундан, деган фикр келиши табиий. Бироқ, бу ходимнинг бутун бир бино, иншооот, уларда ишловчи хизматчи ва ишчилар, мавжуд мол-мулкларнинг хавфсизлиги, бус-бутунлигига жавобгар эканлиги хаёлингизга келмайди. 2004 йилда пойтахт ИИББ Шайхонтоҳур тумани ИИБга қарашли “Қўриқлаш” бўлимида сафдор бўлиб иш бошламагунча Фурқат Тошназаров ҳам шундай ўйлаганди. Бироқ меъёрий ҳужжатлар талаблари, тегишли кўрсатма ва йўриқлар билан яқиндан танишгач, зиммасига юкланган улкан масъулиятни ҳис қилди. Ишлаш жараёнида эса касбий ва жисмоний тайёргарлигини мунтазам ошириб бориш лозимлигини англаган равишда уларни қунт билан ўзлаштира бошлади. Айниқса, туманда жойлашган энг гавжум ва серқатнов, серҳаракат бўлган “Чорсу” бозорида хизмат олиб борганида касб маданияти, жисмоний тайёргарлик машғулотларида орттирган кўникмалари киссавурлар, майда ўғрилар, безори ва жамоат тартиб-қоидаларини менсимайдиган шахслар, ҳуқуқбузарларга қарши муросасиз ва кескин кураш олиб боришда жуда қўл келди. 2024 йилда у Шайхонтоҳур тумани ИИО ФМБ ППХ инспекторлигига ўтказилди. Унинг ўз хизмат вазифаларига виждонан ёндашиши, топшириқларни бекамукўст бажариши, фуқаролар билан хушмуомалалиги, бозор ҳудуди, ишониб топширилган объектларда ҳар бир салбий ҳолатларга тезкор муносабати, қолаверса кўп йиллик тажриба ва кўникмалари раҳбариятнинг эътиборидан четда қолмади. Раҳбарият томонидан берилган кўплаб фахрий ёрлиқлар, қимматбаҳо совғалар, ташаккурномалар бу эътиборнинг ҳосилидир. Куни кеча Наврўз умумхалқ байрами муносабати билан сафдор Фурқат Тошназаровнинг II-даражали “Ички ишлар органларида бенуқсон хизматлари учун” кўкрак нишони билан тақдирлангани унинг хизматларининг эътирофидир. Ҳа, Ватан тинчлиги, халқ манфаатлари йўлидаги фидойи хизматлар ҳеч қачон эътибор ва эътирофсиз қолмайди.
