ТОШКЕНТ ШАҲАР ИЧКИ ИШЛАР БОШ БОШҚАРМАСИ

Бирники мингга...

Юртимизда Янги йил шукуҳи давом этмоқда. Пойтахт ИИББ шахсий таркиби шаҳримиз фуқароларининг байрамни тинч-осойишта ўтказиши, байрам тантаналаридан кўнгилдагидек баҳра олишларини таъминлаш учун туну кун хизматда. Бош бошқарма ЖТСБ бўлинмалари ППХ бригадаси учинчи отрядининг бир гуруҳ ходимлари Ўрта Осиё медицина-педиатрия институти ҳудуди яқинида жойлашган савдо мажмуасида жамоат тартибини сақлаш хизматига жалб этилган. Улар орасида гуруҳ командири, катта сержант Шавкатжон Назаров ҳам хизмат олиб борилишини назорат қилмоқда. Ходимлар диққат-эътибор билан фуқароларнинг ҳаракатланишини кузатар экан, ён-атрофда шубҳали, қаровсиз қолдирилган буюмлар, шубҳали шахсларни аниқлаб, уларни зудлик билан бартараф этиш мақсадида ўта ҳушёр ва сергак. Шавкатжон ҳамкасбларининг одамлар гавжум бўлган нуқталарда хизмат вазифаларини сидқидилдан бажараётганини кўздан кечираркан, ким томондандир тушириб қолдирилган ҳамёнга кўзи тушди. Уни ердан кўтариб, ичидаги нарсаларни: бир неча АҚШ доллари, ўзбек сўми купюралари, нафақа гувоҳномаси ва телефон рақамлари ёзилган қоғоз бўлагини телефони орқали суратга олди. Ходимларга рация орқали ҳамён йўқолгани ҳақида мурожаат бўлса, унга йўллашини хабар қилди. Бироқ тун тушгунча ҳам ҳеч ким мурожаат қилмади. Шавкатжон ҳамённинг ичидаги нафақа гувоҳномасида қайд этилган телефон рақамларини терди. Бироқ қўнғироқлари жавобсиз қолди. Кекса аёл балким эшитмагандир, деган ўйда тун чўкканига қарамай, кўрсатилган манзил томон йўл олди. Гувоҳномада кўрсатилган манзилда бу аёлнинг яшамаслиги маълум бўлгач, у яна қўнғироқ қилганди, аёл гўшакни кўтарди. Суҳбатдан маълум бўлдики, ҳамённинг ҳақиқий эгаси шу аёл. Кекса аёлнинг: “сени овора қилмай, эртага ўзим бориб оламан”, деганига қарамай, Шавкатжон аёл айтган манзилга бориб, топилмани эгасига топширди. Хурсанд бўлган аёл унга “суюнчи” таклиф қилганида, Шавкатжон олмай, уни яхши кунларига ишлатишини тайинлади. Катта сержант Шавкатжон Назаров 2011 йилда Республикамиз Қуролли Кучлар сафларида йигитлик бурчини ўтаб қайтгач, Тошкент шаҳар ИИББ Шайхонтоҳур тумани ИИБда сафдор, милиционер-ҳайдовчиликдан иш бошлаган. Устози катта сержант Фарҳод Бозорбоевдан касбининг жуда кўп қирраларини ўрганди. Устози тумандаги ҳар бир маҳалла, ҳар бир кўча, унда жойлашган иншоотлар, ишхонаю идораларни тунда чироқсиз адашмай топиб бориш кераклигини уқтирарди. Устозининг маслаҳатига амал қилган Шавкатжон Ўзбекистон ИИВ Академияси сержантлар таркибини тайёрлаш олий курсларига ўқишга кирди. Айни пайтда Шавкатжон Тошкент шаҳар ИИББ ЖТСБ бўлинмалари саф бўлинмалари Патруль-пост хизмати бригадаси 3-отряд гуруҳи командири лавозимида ишлаб келмоқда. Отряд командири, подполковник Нодир Зокировни ўзининг нафақат касб, балки ҳаёт йўлининг устози деб билади. Фидойи ва сидқидилдан меҳнатлари туфайли раҳбарият томонидан бир неча бор рағбатлантирилган. Отаси Муроджон ака ва онаси Гулбаҳор опанинг фарзандларига ҳалоллик ва поклик, тўғрилик ва яхшилик, меҳнатсеварлик каби туйғуларни сингдириб вояга етказгани каби Шавкатжон ҳам турмуш ўртоғи Шаҳнозахон билан икки вояга етмаган фарзандларини ўзлари каби ҳалол, меҳнатсевар, камтар, баркамол инсонлар бўлиб етишиши йўлида тарбиялаб келишмоқда. Ҳа, айтгандек, ҳамённинг эгаси Татьяна Васильевна кеча Шавкатжонни қидириб ҳамёнини йўқотган савдо мажмуасига бориб у ерда хизмат ўтаётган ходимлардан Шавкатжонни сўрабди. Уларни Янги йил билан яна бир бор самимий табриклади. Бундан ҳамкасбларнинг кайфиятлари чоғ бўлгани, шубҳасиз. Биргина ҳалол қадамнинг акс садоси кўпчиликка қувонч улашиши нақадар қувончли, шунга айтсалар керак-да: “Бирники мингга, мингники туманга”, деб.

7 Январ 2025 йил

114

Тошкент шаҳар ИИББ бошлиғи генерал-майор Азиз Ташпулатовнинг байрам табриги

Жонажон юртимизга Янги – 2025 йил кириб келмоқда. Тобора яқинлашаётган шукуҳли дамларда муаззам шаҳримиз аҳолисини, пойтахт меҳмонларини, байрамни тантанавор ва тинчлик-осойишталик билан кутиб олишда жамоат тартибини сақлаш, тинчлик-хотиржамликни таъминлашда хизматга шай турган Бош бошқарма шахсий таркиби, ҳамкасбларимизни, фахрийлар, хизмат вақтида мардона ҳалок бўлган ходимларнинг оила аъзолари ва яқинларини байрам билан самимий табриклайман.Таъкидлаш жоизки, турли миллат вакилларидан ташкил топган пойтахт аҳолиси тинч-тотув, ҳамжиҳатликда яшаб, меҳнат қилиб келмоқда. Бу йўналишда ички ишлар органлари ходимлари учун халқ манфаатларига хизмат қилиш, чинакам халқпарвар бўлиш бош мезон бўлиб қолаверади.Янги – 2025 йилда барчангизга узоқ умр, мустаҳкам соғлиқ, оилавий тинчлик-хотиржамлик, дастурхонингизга қут-барака, фаровонлик ва саодат тилайман. Янги йил тинчлик-омонлик йили бўлиб, барчамизга қутлуғ ва барокотли келсин! Ҳурмат билан, Тошкент шаҳар ИИББ бошлиғи,генерал-майорАзиз Ташпулатов

31 Декабр 2024 йил

312

Марказда болалар учун байрам ўтказилди

Болалар ниҳол, қаерга бурсанг ўша ёққа эгилади. Тўғри тарбиялаш, баркамол инсонлар бўлиб етишиши катталарнинг муносабати, билими ва тажрибасига боғлиқ. Афсуски, бола тарбиясига бефарқ, турли сабабларга кўра уларни назоратсиз, қаровсиз қолдириш ҳолатлари ҳамон учраб тургани бор гап. Бу тоифа болалар ва ўсмирлар билан Тошкент шаҳар ИИББ Вояга етмаганларга ижтимоий-ҳуқуқий ёрдам кўрсатиш маркази бевосита шуғулланиб келмоқда. Марказда вақтинча сақланаётган болалар ва ўсмирлар, уларнинг ота-оналари билан Марказ ходимлари ва кўнгиллилар (волонтер) ҳамда таклиф этилаётган мутахассислар томонидан мунтазам равишда якка тартибда профилактик, психологик суҳбатлар, тренинглар, тиббий кўриклар, тарбиявий аҳамиятга эга учрашувлар ташкил этилади. Шу билан бирга уларнинг маданий ҳордиқ олишлари, бўш вақтларини мазмунли ва қизиқарли ташкиллаштириш масалаларига ҳам катта эътибор қаратилади. Болаларнинг дунёқарашини, маънавий-руҳий ҳолатларини тўғри шакллантириш ҳамиша Марказ ҳодимлари диққат-марказида. Жорий йилнинг 27 декабрь куни Марказ тарбияланувчиларига Янги йил байрами муносабати билан байрамона хушкайфият бағишлаш мақсадида Юнусобод тумани Туризм ва маданият бўлими ходимлари, “Дизайн” жамоаси аъзолари, Ўзбек давлат цирки томонидан шодиёна тадбирлари ўтказилди. Мазкур тадбирни Тошкент шаҳар ИИББ бошлиғининг ўринбосари, подполковник Икром Тиллаев очиб берди. У болаларни Янги йил билан самимий табриклаб, болажонларга янги йил совғаларини топширди. Тадбир давомида болалар турли мусиқий ўйинлар, қизиқарли саҳналаштирилган театр томошаларида иштирок этиб, ҳажвий мавзуларда чиқишлар қилишди, шўх куй-қўшиқларга рақсга тушишди. Болалар учун ноз-неъматларга тўла ясатилган тўкин дастурхон атрофида байрам тадбирлари давом эттирилиб, уларнинг завқига завқ, шодлигига шодлик қўшилди. Табиийки, байрам шукуҳи узоқ вақт улар ёдида қолади.

30 Декабр 2024 йил

318

Интерактив хизматлар

Text to speech