ТОШКЕНТ ШАҲАР ИЧКИ ИШЛАР БОШ БОШҚАРМАСИ

Биз ҳақимизда Боғланиш

Қўшимча маълумот

Ижтимоий тармоқларда Тошкентда бир нечта автомашинани уриб кетган “Gentra” русумли автомашинада бўлган 3 киши 7 сутка маъмурий қамоқ жазоси тайинланганлиги ҳақидаги хабар юзасидан қуйидагилар маълум қилинади. 2025 йил 19 апрель куни фуқаро О.Ж. отаси номида бўлган “Gentra” русумли автомашинани (давлат рақами ечилган) таниши, ҳайдовчилик гувоҳномасига эга бўлмаган С.П.га бошқариш учун тақдим қилиб, ўзи автомашинанинг олди йўловчи ўриндиғида келган, орқа ўриндиғида уч нафар уларнинг танишлари П.Г., Қ.Д., Р.Б.лар бўлган. Улар Чилонзор тумани ТХАЙ-Чорбоғ кўчасида тартибсиз ҳаракатланиб, дастлаб “Damas” русумли автомашинани уриб юбориб, шикаст етказган. Шунда ушбу йўналишда хизмат олиб бораётган ЙҲХБ ходимлари уларга “тўхташ” буйруғини берган бўлса-да, С.П. бунга бўйсунмасдан, Ж.О.нинг кўрсатмаси бўйича ҳаракатни давом эттирган. Натижада у “Cobalt” ва 2 та “Gentra” русумли автомобиллар билан тўқнашув содир қилиб, ҳайдовчиларга тан жароҳати ва автомашиналарга шикаст етказган, сўнг “Matiz” русумли автомашина (жами 5 та автомашина) билан тўқнашув содир қилиб, бошқарувни тўхтатган. Мазкур ҳолат юзасидан жиноят иши қўзғатилиб, ҳозирда фуқаролар С.П. ва Ж.О. нисбатан Жиноят кодексининг 173-моддаси 2-қисми “б” банди (ўзганинг мулкига шикаст етказиш) ва 277-моддаси 3-қисми “г” банди (безорилик) билан айб эълон қилиниб, “қамоққа олиш” тарзидаги эҳтиёт чораси қўлланилди. Ўз навбатида, автоуловни орқа ўриндиғида келган фуқаролар П.Г., Қ.Д., Р.Б. жамоат жойида майда безорилик ва ички ишлар органларининг қонуний талабларини бажармаганлиги ҳамда ҳаракатларида жиноят аломатлари бўлмаганлиги сабабли уларга Маъмурий жавобгарлик тўғрисидаги кодексининг 183 ва 194-моддалари асосида 7 сутка маъмурий қамоқ жазоси тайинланган. Хозирда ОАВ ва жамоатчилик томонидан ҳолат юзасидан турли, ҳаққонийлиги текширилмаган талқинлар берилаётганлигини инобатга олиб, "Ахборотлаштириш тўғрисидаги" Қонунга кўра, Интернет тармоғига ҳамма эркин фойдаланиши мумкин бўлган ахборот жойлаштирилгунига қадар унинг тўғрилигини текшириши лозимлиги белгилаб қўйилганлиги эслатиб ўтилади.

22 Апрел 2025 йил

Мактабларда тарғибот тадбирлари

Хабарингиз бор, жорий йилнинг 15 апрелидан 15 майига қадар республикамиз бўйлаб “Хавфсиз ва соғлом юрт” кенг қамровли тезкор-профилактик тадбири ўтказилмоқда. Тадбирдан мақсад: жиноятчиликка қарши кураш, ҳуқуқбузарликларнинг олдини олиш, соғлом ва баркамол келажак авлодни тарбиялаш, фуқароларнинг ҳуқуқий саводхонлиги, маданиятини юксалтиришга қаратилган. Мазкур тадбир жойларда ҳокимликлар, ҳуқуқни муҳофаза қилувчи органлар, соғлиқни сақлаш, маҳалла “еттилиги” ҳамда фаоллари, масъуллар ҳамкорлигида амалга ошириб келинмоқда. Шундай тарғибот тадбирларидан навбатдагиси пойтахтимизнинг Бектемир туманида жойлашган 289- ҳамда 358-сонли умумтаълим мактабларида бўлиб ўтди. Унда туман ИИО ФМБ бошлиғи У.Назаров, туман прокурори С.Мухторов, маҳалла “еттилиги”, фаоллари, мактаблар маъмурияти ва ўқувчилари иштирок этишди. Ўқувчилар олдида сўзга чиққанлар жиноятчиликнинг олдини олиш ва ҳуқуқбузарликларнинг келиб чиқиш сабабларини атрофлича муҳокама қилиш баробарида ижтимоий тармоқлардаги турли хил қадриятларимизга ёт ғоялардан эҳтиёт бўлиш, ҳар бир тақдим этилаётган маълумотларга ишонавермаслик, шунингдек, гиёҳванд моддалари савдосига аралашиб қолмаслик, гиёҳванд моддалари, психотроп, кучли таъсир қилувчи дори воситаларининг инсон руҳияти ҳамда яшаш тарзига зарари, мудҳиш оқибатлари ҳақида ҳаётий мисоллар орқали тушунтириш ва огоҳлантиришлар беришди. Учрашув қатнашчилари билан савол-жавоблар сўнггида жиноятлар профилактикаси, ёшлар тарбиясига эътибор, маҳаллаларда ижтимоий муҳит барқарорлигини таъминлаш масалалари юзасидан фикрлар алмашинилди ҳамда тегишли тавсия ва таклифлар берилди.

21 Апрел 2025 йил

149

Муаммолар ечимини излаб раҳбар қабулига

Тошкент шаҳар Ички ишлар бош бошқармаси биносида бошқарма бошлиғи, полковник Равшан Султанходжаевнинг навбатдаги қабули бўлиб ўтди. Қабулда 50 нафар фуқаролардан 51 та мурожаат тушди. Уларнинг 4 таси жойида ижобий ҳал этилган бўлса, 5 таси бўйича малакали ҳуқуқий тушунтиришлар берилди. Мурожаатларнинг мазмунига кўра унда келтирилган муаммо сабабларини чуқурроқ ўрганиш учун муддат талаб этиладиган 42 та мурожаат ижроси назоратга олинди. Хусусан, фуқаролар ечим излаган, мурожаат қилишига сабаб бўлган масалалар асосан: суриштирув-тергов ҳаракатлари, мол-мулк ва пул маблағларини ундириш, ички ишлар органларига хизматга тиклаш, ички ишлар органларида хизматни ўташ, бедарак йўқолганлар бўйича қидирув, паспорт тизими билан боғлиқ масалаларни ташкил этган.Олмазор туманида яшовчи фуқаро Ш.В. фарзанди М.Ш.нинг уйидан чиқиб кетиб, қайтиб келмагани юзасидан қизини топишда амалий ёрдам сўради. Унинг мурожаати жойида тезкор ўрганилиб, чоралар кўрилгач, фарзанди Бухоро вилоятида эканлиги аниқланди. Айни пайтда уни Тошкентга олиб келиш чоралари кўрилмоқда. Шунингдек, фуқаролар В.Колтинов ва Р.Дишкинларга ID карталари расмийлаштириб берилди. Фуқаро М.Подоссинникованинг аризаси асосда Ўзбекистон Республикаси фуқаролиги тантанали равишда топширилди. Бош бошқарма бошлиғи қабулида мурожаатлари қонуний ҳал қилинган, ечимидан қониққан шахслар мамнуният билан ўз миннатдорлигини билдиришди.

21 Апрел 2025 йил

147

Бош бошқармада “миллионлар ўйинига” старт берилди

Аҳоли ўртасида соғлом турмуш тарзини тарғиб қилиш аҳоли кенг қатламларини жисмонан ва руҳан соғломлаштиришда спортнинг ролини кучайтириш, оммалаштириш, фуқароларнинг ижтимоий фаоллигини ошириш ишларида спортнинг ўрни алоҳида. Ички ишлар органларида, хусусан, Тошкент шаҳар Ички ишлар бош бошқармаси таркибий тузилмалари ва худудий бўлимлари, Тошкент шаҳри бўйича Фавқулодда вазиятлар бошқармаси ўртасида спортнинг турли йўналишлари бўйича даврий равишда тизимлараро мусобақалар ўтказиб келиниши фикримизнинг исботидир. Пойтахт ИИББ ҳамда “Динамо” жисмоний тарбия ва спорт жамияти кенгаши қарори асосида спортнинг футбол турига старт берилди. Унда Бош бошқарма тизимидаги соҳавий хизмат ходимларидан иборат 17 та жамоалар беллашади. Саралаш ўйинларидан сўнг чорак финалга йўл олган жамоалар жорий йилнинг 28 апрелида ўзаро куч синашишади. Зафар қучган жамоалар ярим финалда беллашиш учун 29 апрель куни майдонга тушишади. Унда ғолиб бўлганлар 1 май куни 1, 2, 3-фахрли ўринлар учун финал ўйинларида иштирок этади. Мусобақа ғолибларини қимматбаҳо совғалар, кубоклар, медаллар ва фахрий ёрлиқлар кутмоқда. Баҳслар қизғин ва шиддатли бўлиши, футбол мухлисларининг завқи ва олқишларига сазовор бўлиши, шубҳасиз. Барча жамоаларга зафар ва муваффақиятлар ёр бўлишини тилаб қоламиз.

21 Апрел 2025 йил