Тошкент шаҳар ИИББ раҳбарияти жиноятларнинг олдини олиш мақсадида пойтахт автомашина ювиш шахобчалари маъмурияти билан суҳбатлашишди

Тошкент шаҳар ИИББ бошлиғининг кўрсатмасига биноан, унинг ўринбосари полковник Муродилла Алиқориев 2020 йилнинг 29 ва 30 октябрь кунилари Йўл ҳаракати хавфсизлиги бошқармаси ва Ҳуқуқбузарликлар профилактикаси бошқармасидаги масъул шахслар билан биргаликда пойтахтдаги автомашина ювиш ва шу каби хизматлар кўрсатиш билан шуғулланувчи 217 та ташкилотлар вакиллари билан учрашишди. Тадбир мақсади – пойтахт автомашина ювиш шахобчалари ҳудудида учраб турадиган, хусусан, транспорт воситаларини ўз мақсадида ишлатиш, олиб қочиш каби жиноятларнинг олдини олиш эди. 

Ташкилот раҳбарлари улар ишга олаётган шахслар учун масъулликлари ҳақида огоҳлантирилдилар. Ишчиларнинг масъулият ҳудудини белгилаш, маълумотларини қайд этиш ҳам раҳбарнинг вазифаси эканлиги қайд этилди. Шу билан бирга ишчиларни мижознинг автомобили калитини олишларига йўл қўймасдан, бунинг ўрнига барча мижозлардан калитларни олувчи битта масъул шахсни тайинлаш тавсия этилди.

Мазкур ташкилотлар раҳбарлари ўз навбатида ишга қабул қилинаётган шахсларнинг маълумотларини текшириш қийинлигини, бунда ҳудудий ички ишлар органларининг ёрдамлари кераклигини айтишди. Мазкур илтимос қондирилди, энди автомобиль ювиш шахобчаси раҳбари профилактика инспекторлари билан биргаликда ишга олинаётган шахсларнинг маълумотлари ҳаққонийлигини текшириши мумкин. Шу билан бирга у ишга олинаётган шахс қидирувда эмаслигини, хусусан, илгари автомобиль олиб қочмаганлигини текшириш мумкин. 

Ҳурматли транспорт воситалари ҳайдовчилари! Сиздан ҳам мазкур муаммога жиддий ёндашишни ва машинангизнинг калитини автомобиль ювиш шахобчасининг оддий ишчиларига бермасликни сўраймиз. Унутманг, сиз йўқлигингизда автомобилингиз турли мақсадларда ишлатилиши мумкин. Муаммо чиқишидан олдин тўғри йўл тутиб ўз вақтингиз ва асабингизни асранг.