Кечиримлилик инсон олижаноблигининг ёрқин намунасидир. Хато қилмоқ бор, уни тузатмаслик айб. Мамлакатимиз раҳбарининг жорий йилнинг 5 декабридаги Фармонига кўра Ўзбекистон Республикаси Конституцияси қабул қилинганлигининг 32 йиллиги муносабати билан Асосий Қомусимизнинг 109-моддаси 23-бандига асосан, билиб-билмай жиноят содир этган, қилмишига чин кўнгилдан пушаймон бўлган ва тузалиш йўлига кирган ҳозирги вақтда жазо муддатини ўтаётган 483 нафар шахс афв этилди. Улар орасида Бектемир туманида истиқомат қилувчи икки нафар фуқаролар ҳам бор. Авф этилганларнинг ҳаётга мослашуви, бандлигини таъминлаш, саломатлигини тиклаш ва бошқа ижтимоий-иқтисодий ҳамда маиший масалаларни амалга ошириш туман ИИО ФМБ Пробация гуруҳининг назоратига олинди. Шу мақсадларда гуруҳ ходимлари маҳкумларнинг яшаш манзиллари бўйича профилактик тадбирлар олиб бориш билан бирга уларнинг яшаш шарт-шароитлари, турмуш тарзларини ўрганиб чиқишди. Шунингдек, улар тумандаги кўп тармоқли тиббиёт марказида тиббий кўрикдан ўтказилиб, саломатликларини тиклаш бўйича тегишли даволаш муолажалари белгиланди. Уларни иш билан таъминлаш борасида туман аҳоли бандлигига кўмаклашиш марказида мавжуд бўлган вакансифлар тавсия этилиб, танланган ишлар бўйича йўлланмалар берилди. Ҳаётга мослашув жараёнидаги илк муддатларда ижтимоий-маиший ҳамда моддий ёрдам кўрсатиш мақсадида, туман ижтимоий кўникма маркази томонидан белгиланган моддий ёрдам ажратилиб ҳар иккисига топширилди. Собиқ маҳкумларга кўрсатилаётган бу каби инсонийлик намуналаридан кўзланган мақсад – юртимиз фуқароларининг шу юрт фарзанди, унинг ажралмас қисми эканлигини англаш, барча учун белгиланган ҳақ-ҳуқуқлардан фойдаланиш, тўғри йўлда муносиб яшаш мумкинлигини ҳис қилишида муҳим қадамдир.