Ichki ishlar organlari xodimlari kuni munosabati bilan Toshkent shahar Ichki ishlar bosh boshqarmasida bayram tadbiri o‘tkazildi. Tadbirda Toshkent shahar huquqni muhofaza qiluvchi organlar va shahar hokimiyati rahbariyati, bosh boshqarma va tarkibiy tuzilmalar xodimlari ishtirok etdi.

Orkestr sadolari ostida boshlangan marosimda davlatimiz rahbari topshirig‘i bilan xizmatda foydalanish uchun 8 ta BYD va 15 ta Damas avtotransport vositalari sohaviy xizmat xodimlariga tantanali ravishda topshirildi. Taqdim etilgan mazkur transport vositalari sohaning moddiy-texnik bazasini yana-da mustahkamlash va xizmat sifatini yaxshilashda o‘z hissasini qo‘shishi bilan ahamiyatli bo‘ldi.

Taqdimotdan keyin Toshkent shahar IIBBda joylashgan xotira maydonida xizmat burchini ado etish vaqtida halok bo‘lgan ichki ishlar organlari xodimlarining yorqin xotirasi yod etildi. Marosimda ichki ishlar organlari faxriylari, mehmonlar, bosh boshqarma rahbariyati va shaxsiy tarkib hamda vatan uchun qahramonlarcha jon fido etgan xodimlarning oila aʼzolari va yaqinlari ishtirok etishdi. Xotira monumentiga gullar qo‘yildi.

Shundan so‘ng, Bosh boshqarmaning maʼrifat zalida bayram tadbirining tantanali marosimi boshlandi. Unda Toshkent shahar IIBB boshlig‘i tomonidan Ichki ishlar vazirining bayram tabrigi o‘qib eshittirildi.

Bosh boshqarma boshlig‘i general-mayor Aziz Tashpulatov ichki ishlar organlari xodimlarini, faxriylarni hamda xizmat vaqtida qahramonlarcha halok bo‘lgan xodimlarning oila aʼzolarini bayram bilan tabriklab, ularga muvaffaqiyatlar tiladi.

Tadbir davomida o‘z xizmati bilan kasbdoshlariga o‘rnak bo‘lgan bir qator xodimlar Ichki ishlar vaziri, Toshkent shahar IIBB boshlig‘i va boshqa huquqni muhofaza qiluvchi organlar rahbarlarining ko‘krak nishoni, faxriy yorlig‘i va esdalik sovg‘alari bilan taqdirlandi.

Bayram so‘ngida qatnashchilar uchun konsert dasturi namoyish etildi.