Yangihayot tumanida “Zo‘ravonlikka qarshi 16 kun” aksiyasi doirasida “Biz zo‘ravonlikka qarshimiz!” shiori ostida tadbir tashkil etildi. Unda tuman IIO FMB xotin-qizlar masalalari bo‘yicha inspektorlar, “Tashabbus” mahallasi ayollari ishtirok etdi.

Tashkilotchilar tomonidan “Xotin-qizlar va erkaklar uchun teng huquq hamda imkoniyatlari kafolatlari to‘g‘risida”gi Qonun, “Bola huquqlari to‘g‘risida”gi Konvensiya va boshqa huquqiy hujjatlarning mazmun-mohiyati keng tushuntirildi. Tadbirda xotin-qizlarning huquq va manfaatlarini himoya qilish, ularga nisbatan zo‘ravonlikning oldini olish, xotin-qizlarning jamiyatdagi mavqeini yana-da oshirish, gender tengligini taʼminlash masalalari yuzasidan fikr almashildi.

Mazkur tadbir davomida xotin-qizlarni tazyiq va zo‘ravonlikdan himoya qilish mavzusiga oid videorolik, slaydlar ishtirokchilarga namoyish etildi. Uchrashuv so‘ngida ishtirokchilar o‘zlarini qiziqtirgan savollar bilan murojaat qilib, mutaxassislardan javoblar oldilar.