Poytaxtning Mirzo Ulug‘bek tuman hokimi, tuman prokurori, IIO FMB boshlig‘i, Ichki ishlar vazirligi Akademiyasi vakillari, mahalla raislari boshchiligida mahalla “yettiligi” va keng jamoatchilik vakillari ishtirokida uchrashuv bo‘lib o‘tdi. Uchrashuv O‘zbekiston Respublikasi Prezidentining joriy yilning 5 yanvarida “Respublika mahallalarida xavfsiz muhitni yaratish yo‘nalishida yaxlit manzilli ishlash tizimini joriy etishga qaratilgan qo‘shimcha chora-tadbirlar to‘g‘risida”gi hamda “2026 yilda respublika mahallalarida jinoyatchilikning barvaqt profilaktikasi samaradorligini yanada oshirish bo‘yicha tashkiliy chora-tadbirlari to‘g‘risida”gi Qarorlari mazmun-mohiyatini chuqur o‘rganish, ijrosini samarali ta’minlash masalalariga qaratildi. Mirzo Ulug‘bek tumanida 70 ta mahalla mavjud bo‘lib, 2025 yil yakuniga ko‘ra 5 tasi “qizil”, 48 tasi “sariq” va 17 tasi “yashil” toifalarda qolgan. Ushbu mahallalarda kriminogen vaziyatga salbiy ta’sir ko‘rsatayotgan omillarni aniqlash, ularni bartaraf etish choralarini ko‘rish, ijtimoiy profilaktikani amalga oshiruvchi subyektlar tomonidan amalga oshirilayotgan ishlarni doimiy nazoratini olib borish, oila-turmush doirasidagi, ayollar va yoshlar tomonidan sodir etilayotgan jinoyatlarning kelib chiqish sabablarini o‘rganish va bartaraf etishga qaratilgan manzilli chora-tadbirlarni ishlab chiqish hamda amalga oshirish masalalari e’tibor markazida bo‘ldi. Ko‘rsatkichlari salbiy bo‘lgan mahallalar tuman hokimligi, prokurori, IIO FMB boshlig‘i, o‘rinbosarlari hamda sohaviy xizmatlar rahbarlariga biriktirildi. Shuningdek, tumandagi “qizil” hamda “sariq” toifadagi mahallalarda bu boradagi ishlarni kuchaytirish, toifalarini ijobiy tomonga o‘zgartirish qatorida “yashil” toifadagi mahallalar maqomini barqaror ushlab turish bo‘yicha zarur topshiriq va kompleks chora-tadbirlar ishlab chiqish belgilab olindi.